ዘንድሮ ግን በአመራሩና በሠራተኛው የጋራ ርብርብ፣ በበጀት አቅርቦትና ወቅታዊ እርምጃዎችን በመውሰድ የታዩ ውስንነቶችን በመቅረፍ “በዘርፉ የመጀመሪያውን QMS ISO-9001:2015 የምስክር ወረቀት በማግኘታችን እንኳን ደስ አላችሁ” በማለት የደስታ መልዕክታቸውን አስተላልፈዋል።የወንጂ/ሸዋ ስኳር ፋብሪካ ዋና ስራ አስኪያጅ አቶ ሰለሞን በቀለ በመርሃ ግብሩ ላይ ባስተላለፉት መልዕክትና የስራ አቅጣጫ፡ ለዚህ ስኬት መብቃት ለማኔጅመንት አባላትና ለባለሙያዎች የተሰጡ ተከታታይ ስልጠናዎች ትልቅ ድርሻ እንደነበራቸው ገልጸዋል። ሂደቱ አድካሚና ፈታኝ ቢሆንም በጽናት ማለፍ መቻሉን ጠቁመዋል።

አቶ ሰለሞን “ይህ ድል የበለጠ እንድንተጋ የሞራል ስንቅ ሊሆነን ይገባል” በማለት፣ የጥራት ኦዲተሮች የሰጡት አስተያየት ለፋብሪካው ትልቅ ትምህርት ከመሆኑም ባለፈ ለሌሎች ፋብሪካዎች እንደ ተሞክሮ የሚቀመር መሆኑን ገልጸዋል። ውጤቱን በዘላቂነት ለማስቀጠልም መሬት ላይ ያሉ ተግባራትን በተከታታይ መገምገም እንደሚገባ አሳስበዋል። በመጨረሻም ለመላው የፋብሪካው አመራሮች፣ ሠራተኞች፣ ባለድርሻ አካላት እና በተለይም ለሠራተኛ ማህበሩ ላደረጉት ልዩ ድጋፍ ምስጋናቸውን አቅርበዋል።

የመርሃ ግብሩ ማጠቃለያ በደመቀ ሁኔታ የተከናወነ ሲሆን፣ የስኬቱ መታሰቢያ የሆነው የኬክ መቁረስ ሥነ-ሥርዓት ተካሂዷል። በተጨማሪም ለዚህ ታላቅ ስኬት ከፍተኛ አስተዋጽኦ ላበረከቱ የዘርፍና የመምሪያ ሥራ አስኪያጆች፣ ለውስጥና ለውጭ ኦዲተሮች እንዲሁም ለባለድርሻ አካላት የምስጋና የምስክር ወረቀት ተበርክቶላቸዋል። በተጨማሪም መርሃ ግብሩ በደመቀ ሁኔታ እንዲከበር ላደረጉ የስርዓተ ፆታና ወጣቶች የስራ ክፍልና ሴት አምባሳደሮች ምስጋና አቅርበዋል።